आज तालुक्यातील 50 किलोमिटरच्या रस्त्यावरील खड्डे बुजविल्याची शक्यता आहे. पण ज्या दिवशी खड्डे बुजविले त्याच्या दुसऱ्या दिवशी खड्डे उखडले गेले आहेत.
सांगोला / नाना हालंगडे
सांगोला तालुक्यातील रस्ते खड्ड्यात हरवून गेले आहेत. सांगोला सार्वजनिक बांधकाम विभागाच्या अधिकाऱ्यांनी याबाबत लक्ष घालून रस्ते पूर्ववत करणे अपेक्षित असताना काही ठिकाणच्या रस्त्यात केवळ माती किंवा फुफाटा टाकून खड्डे बुजवण्याचे नाटक केले जात आहे. या प्रकरणी लवकरच आंदोलन करण्याचा इशारा राष्ट्रीय समाज पक्षाचे जिल्हाध्यक्ष सोमा (आबा) मोटे यांनी दिला आहे.
सांगोला तालुक्यातून राष्ट्रीय व राज्य मार्ग गेलेले आहेत. याची सिमेंट काँक्रीटीकरणाची कामे सुरू आहेत. पण तालुक्यातील डांबरीकरणाच्या रस्त्याकडे हा तालुक्यातील बांधकाम विभाग लक्ष देत नाही. त्यामुळे 120 किलोमिटरहून अधिक लांबीच्या रस्त्यांची वाट लागलेली आहे.
सध्या जी रस्त्याची कामे सुरू आहेत, त्यामध्येही गुणवत्ता नाही. असे हे प्रकार होत असताना, तालुक्याचे लोकप्रतिनिधीही गप्प आहेत. त्यामुळे तालुकावासियांना अनंत अडचणींना तोंड देत प्रवास करावा लागत आहे.
आज तालुक्यातील 50 किलोमिटरच्या रस्त्यावरील खड्डे बुजविल्याची शक्यता आहे. पण ज्या दिवशी खड्डे बुजविले त्याच्या दुसऱ्या दिवशी खड्डे उखडले गेले आहेत. विशेष म्हणजे या विभागाचा एकही कर्मचारी या कामावर आढळून आला नाही. याच कामाबाबत उपअभियंत्याकडे विचारणा केली पण, हे अधिकारी काहीही बोलायला तयार नाहीत.
