सांगोल्यात दरोडेखोरांच्या मुसक्या आवळल्या
सोन्यासह ४५ लाखांचा मुद्देमाल जप्त
- गुड न्यूज, सोलापूर जिल्ह्यात शाळांची सुट्टी वाढली
- पंढरीची कार्तिकीही लालपरीअभावी सुनिसुनी
- आबासाहेब, तुम्ही गेल्यावर लालपरीही पोरकी झालीय
थिंक टँक न्यूज नेटवर्क : एच. नाना
अपघाताचा बनाव रचून दुचाकीवरील दोघांना बेदम मारहाण करून त्यांच्याकडील सोने व रोख रक्कम असा ४५ लाखांचा मुद्देमाल पळवून नेणाऱ्या दरोडेखोरांच्या मुसक्या सोलापूर ग्रामीण एल. सी. बी. व सांगोला पोलिसांनी आवळल्या आहेत. पोलिसांच्या या धडाकेबाज कामगिरीचे कौतुक होत आहे.
गुन्ह्यातील ९२५ ग्रॅम, ५६० मिली ग्रॅम वजनाचे सोन्याचे बिस्कीटसह एकूण ४५ लाख ८१ हजार ५२२ रू . किंमतीचा मुद्देमाल हस्तगत करण्यात आला आहे.
याबाबत सविस्तर वृत्त असे की, ८/११/२०२१ रोजी सकाळी ९ : ३० वा . च्या सुमारास फिर्यादी सुशांत बापूसो वाघमारे , वय २२ वर्षे , रा . दिघंची ता . आटपाडी , जि . सांगली यांना त्यांचे मालक विजय काटकर यांनी बोलावून घेवून त्यांच्याकडील जुने सोने देवून सांगोला येथील महाकाली टंचचे दुकानात जावून ते दागिने गाळून शुध्द करून त्याचे बिस्कीट करून आणण्यास सांगितले होते. त्यानुसार फिर्यादी व त्याचा मित्र असे दोघेजण मोटार सायकलवरून सांगोला येथील महाकाली टंचचे दुकानात येवून त्यांना जुने सोने वितळून त्याचे बिस्कीट बनवण्यासाठी दिले. सोन्याचे बिस्कीट बनवून दिल्यानंतर ते दोघे सायंकाळी ७:३० वा . च्या सुमारास परत मोटारसायकलवरून दिघंची ता . आटपाडीकडे जाण्याकरीता निघाले. तेव्हा फिर्यादी व त्याचा मित्र हे रात्री ८:३० वा . च्या सुमारास मौजे एकतपूर ते आचकदाणी रोडवर फॉरेस्टजवळील बागलवाडी शिवारात आले असता पाठीमागून एक अनोळखी चारचाकी गाडी भरधाव वेगात येवून फिर्यादीनुसार दुचाकीला धडकली.
फिर्यादी व त्याचा मित्र दोघेही रस्त्याच्या कडेला असलेल्या चारीत जावून पडल्याने गंभीर जखमी झाले. त्यावेळी धडक दिलेले चारचाकी वाहनही रोडच्याकडेला चारीत जावून पडले. त्यानंतर चारचाकी वाहनातून दोघेजण बाहेर येवून फिर्यादीला हाताने व दगडाने मारहाण करून मोबाईल फोन काढून घेवून फिर्यादीच्या खिशात असलेले सोन्याचे बिस्कीट जबरदस्तीने काढून घेवून वाहन पेटवून देवून निघून गेले. या गुन्ह्याची नोंद सांगोला पोलीस ठाण्यात झाली होती.
गुन्ह्याचे स्वरूप ओळखून पोलीस अधीक्षक श्रीमती तेजस्वी सातपुते, अपर पोलीस अधीक्षक हिंमत जाधव, उपविभागीय पोलीस अधिकारी श्रीमती राजश्री पाटील, मंगळवेढा उपविभाग मंगळवेढा यांनी घटनास्थळी भेट देवून गुन्हे शाखेचे पोलीस निरीक्षक सर्जेराव पाटील व सांगोला पोलीस ठाण्याचे पोलीस निरीक्षक सुहास जगताप यांना मार्गदर्शन करून सदरचा गुन्हा तात्काळ उघडकीस आणण्याकामी विशेष पथक नेमण्याबाबत सूचना दिल्या होत्या. त्यानुसार गुन्हे शाखेचे पोनि सर्जेराव पाटील व पोनि सुहास जगताप यांनी एक संयुक्त पथक तयार करून तपास सुरू केला.
गुन्हयात वापरलेल्या वाहनाच्या वाहनमालकाचा शोध घेवून तपास करण्याच्या सूचना दिल्या. सदरचा गुन्हा हा फिर्यादीचा मित्र हा त्याचे गावाकडील मित्राच्या मार्फतीने प्लॅन करून गुन्हा करण्यासाठी मिरज येथील दोन इसमांची मदत घेवून गुन्हा केला असल्याबाबत खात्रीशीर माहिती मिळाली. त्यावरून पथकने मिरज येथे जावून त्याबाबत माहिती घेतली असता गुन्ह्यातील संशयित इसम हे मिरज शहरात एका वाईनशॉप जवळ थांबले असल्याबाबत माहिती मिळाली. त्यांना तात्काळ ताब्यात घेवून त्यांच्याकडे गुन्हयाच्या अनुषंगाने विचारपूस केली असता त्यांनी सदरचा गुन्हा केला असल्याचे कबूल केले.
गुन्हयातील चोरलेले ९ २५ ग्रॅम , ५६० मिली ग्रॅम वजनाचे सोन्याचे बिस्कीट असा एकूण ४५ लाख ८१ हजार ५२२ रू . किंमतीचा मुद्देमाल आरोपींनी काढून दिला तो जप्त करण्यात आला आहे. गुन्हयात ताब्यात घेतलेल्या मिरज येथील इसमांकडे अधिक चौकशी केली असता , त्यातील एक इसम हा सांगली येथील होमगार्ड असून तो व्यसनाधिन आहे . तसेच दुसरा हा इलेक्ट्रॉनिक दुकानात सेल्समन म्हणून कामास असून त्यास शेअर मार्केट मध्ये मोठ्याप्रमाणात तोटा झाल्याने तो कर्जबाजारी झाल्याने त्यामुळे त्याने त्याचे मित्राच्या मदतीने सदरचा गुन्हा केल्याचे सांगितले.
सदर गुन्हयाचा पुढील तपास सांगोला पोलीस ठाण्याचे सपोनि नागेश यमगर हे करीत आहेत. सदरची कामगिरी ही पोलीस अधीक्षक श्रीमती तेजस्वी सातपुते, अपर पोलीस अधीक्षक हिंमत जाधव, उपविभागीय पोलीस अधिकारी श्रीमती राजश्री पाटील मंगळवेढा उपविभाग यांच्या मार्गदर्शनाखाली, गुन्हे शाखेचे पोलीस निरीक्षक सर्जेराव पाटील , सांगोला पोलीस ठाण्याचे पोलिस निरीक्षक सुहास जगताप यांच्या नेतृत्वाखाली, सांगोला पोलीस ठाणेचे सपोनि नागेश यमगर , गुन्हे शाखेचे सफौ ख्वाजा मुजावर , श्रीकांत गायकवाड , पोलीस अंमलदार नारायण गोलेकर , मोहन मनसावाले , चालक समीर शेख , सांगोला पोलीस ठाण्याचे राहूल देवकते , राहूल कोरे , सायबर पोलीस ठाण्याचे अन्वर अत्तार यांनी यशस्वी केली.