मुंबई-चेन्नई मेल रेल्वे बंद झाल्याने केम येथील पासधारकांची गैरसोय

केम (विशेष प्रतिनिधी) : मुंबई-चेन्नई मेल ही रेल्वेच्या नवीन वेळापत्रकानुसार बंद झाल्याने केम येथील पासधारकांचे व इतर प्रवाशांचे हाल होत आहेत. तरी मुंबई-विजापूर ही फास्ट पॅसेंजर गाडी नियमीत करून केम येथे थांबा मिळावा, अशी मागणी सोलापूर जिल्हा परिषदेचे अध्यक्ष अनिरुद्ध कांबळे व माजी सरपंच अजितदादा तळेकर यांनी केली आहे.

केमहून कुर्डुवाडी व सोलापूर जाण्यासाठी सकाळी सात वा. मुंबई-चेन्नई मेल होती. सोलापूर येथून सायंकाळी सहा वाजून वीस मिनिटांनी ही मेल सुटत होती. ती सायंकाळी केमला आठ वा. पोहचत होती. त्यामुळे या गाडीने कुर्डुवाडी, बार्शी, सोलापूर, पंढरपूरहून पासधारक व इतर प्रवासी येत होते. मात्र ही सोयीची मेल बंद झाल्याने विजापूर-मुंबई गाडीला थांबा दिल्यास सोय होईल.

ही गाडी आठवड्यातून चार दिवस आहे. सोमवार ते गुरुवार अशी आहे. त्यामुळे शुक्रवार ते रविवार सोलापूरहून येणारे पासधारक व प्रवाशी कसे येणार? त्यासाठी रेल्वेप्रशासनाने ही गाडी नियमित करून सोलापूरहून सायंकाली सहा वाजता सोडावी, अशी मागणी प्रवाशांतून होत आहे.

केम स्थानकावर पुणे सुपरफास्ट इंद्रायणी गाडीला सोलापूरला जाताना थांबा मिळावा. या मागण्यासाठी माढा लोकसभा मतदार संघाचे खासदार व रेल्वे बोर्डाचे सदस्य रणजितसिंह निंबाळकर यांची भेट घेणार असल्याची माहिती अजित तळेकर यांनी दिली.